नवलपरासी (बर्दघाट–सुस्तापूर्व)को गैँडाकोटस्थित नारायणी नदीबाट ‘राइनो क्रुज’ सञ्चालनमा आउने भएको छ ।
नवलपुर र यस क्षेत्रमा पर्यटकीय क्षेत्रमा दिगो र सम्भावनायुक्त नयाँ गन्तव्य बनाउने योजनासहित राइनो क्रुज सञ्चालनमा ल्याउन लागिएको हो ।
राइनो वाटर इन्टरटेनमेन्ट प्रा.लि र होटल रिभर क्राउन प्रा.लिले संयुक्त रुपमा नारायणी नदीमा राइनो क्रुज सञ्चालन गर्न लागेका हुन् ।
कम्पनीका प्रबन्ध निर्देशक दीपक ढुङ्गेलले पर्यटकीय प्रयोजनका लागि सञ्चालन गर्न लागिएको क्रुज गैँडाकोट पुलचोकबाट देवघाटसम्म सञ्चालन गर्ने तयारी गरिएको बताउनुभयो । राइनो क्रुजलाई यातायातका लागि भन्दा पनि पर्यटन प्रवद्र्धन गर्ने उद्देश्यले सञ्चालन गर्ने तयारी गरेको उहाँले बताउनुभयो ।
यही माघ महिनामा सञ्चालनमा ल्याउने तयारीस्वरुप राइनो क्रुजलाई पुनःनिर्माण गरिएको उल्लेख गर्दै प्रबन्ध निर्देशक ढुङ्गेलले प्राविधिक परीक्षण पछि नियमित सञ्चालनको तयारी भइरहेको बताउनुभयो ।
दुई वटा तला रहेको क्रुजको क्षमता दुई सय जना यात्रुको भए पनि १५० जनालाई सेवा दिनेगरी सञ्चालन गर्न लागिएको ढुङ्गेलको भनाइ छ । क्रुजभित्रै रेष्टुराँको सुविधा रहने भन्दै उहाँले क्रुजमा मनोञ्जन हुनेगरी लाइभ म्युजिक (गीत, सङ्गीत) प्रस्तुत हुने बताउनुभयो ।
यस राइनो क्रुजलाई लक्जरी रिभर क्रुज बनाउँदै नियमित प्याकेजहरु सञ्चालन गरिने उहाँले बताउनुभयो । होटल रिभर क्राउन र राइनो क्रुजलाई एउटै कम्पनीबाट सञ्चालन गरी होटललाई तारे (स्टार) होटलको स्तरमा पुर्याउने र आगामी पाँच वर्षभित्र पब्लिक कम्पनीमा गएर सर्वसाधारणका लागि आईपीओ जारी गर्ने तयारी रहेको उहाँको भनाइ छ । राइनो क्रुज सञ्चालनपछि सम्भाव्यता अध्ययन गर्दै थप दुई वटा ‘मिनी क्रुज’ पनि सञ्चालन गर्ने तयारी रहेको ढुङ्गेलले जानकारी दिनुभयो ।
गैँडाकोटमा नारायणी नदीमाथि बन्दै गरेको सिग्नेचर पुलसँगै राइनो क्रुजले यस क्षेत्रमा पर्यटनको नयाँ ढोका खोल्ने ढुङ्गेलले बताउनुभयो । विसं २०७९ माघ १ गते चितवनको भरतपुर–१६ काभ्रेघाटमा सञ्चालन गरिएको क्रुज विभिन्न कारणले बन्द भएपछि पुनःनिर्माणसँगै गैँडाकोटबाट सञ्चालन गर्न लागिएको हो ।
काभ्रेघाट वरिपरी नारायणी नदीको बहाब, अवस्थिति धेरै कारणले त्यहाँ क्रुज यात्रा सहज नहुँदा यो बर्खामा विभिन्न उपकरण प्रयोग गरी क्रुजलाई गैँडाकोटसम्म ल्याइएको थियो । क्रुज सञ्चालनका लागि कम्पनीले यसअघि नै पवित्र धार्मिकस्थल देवघाटबाट गोलाघाटसम्मको अनुमति पाइसकेको छ ।