काठमाडौंमा जारी नेपाल प्रिमियर लिग (एनपिएल) आज एक रोमाञ्चक मुकाबिलाको प्रतीक्षा गरिरहेको छ । मैदानमा चितवन राइनोज र लुम्बिनी लायन्स आमनेसामने हुनेछन्, जहाँ दुवै टिमका उद्देश्य फरक तर भरपूर दबाबका छन्।
कुशल मल्लको नेतृत्वमा चितवन राइनोज पहिलो खेलमै कर्णाली याक्सलाई ४ विकेटले पराजित गर्दै उत्कृष्ट सुरुआत गरिसकेको छ। जीतको लयलाई निरन्तरता दिंदै चितवन ले यसपटक प्लेअफ बुक गर्ने योजनामा छ।
यता रोहित पौडेलको कप्तानीमा लुम्बिनी लायन्स भने गत वर्षको निराशाजनक प्रदर्शन भुल्दै नयाँ यात्राको सुखद सुरुवात खोज्दैछ। गएको संस्करणमा सात खेलमध्ये एक जित मात्रै दर्ता गरेको लुम्बिनी यसपटक पूर्ण रूपमा नयाँ मोडमा देखिन चाहन्छ।
उता इतिहासले भने आजको भिडन्तलाई अझ रोचक बनाएको छ।
गत सिजनको लिग चरणमा चितवनविरुद्ध लुम्बिनी ३३ रनले विजयी भएको थियो। त्यो हारको बदला चुकाउने अवसर आज चितवनका लागि छ, जबकि लुम्बिनी पुनः त्यसै विजयको स्वाद दोहोर्याउने मनसायमा छ।
आजको खेलले न केवल तालिकामा असर पार्नेछ, तर दुई टोलीबीचको ‘अनौपचारिक प्रतिस्पर्धा’लाई पनि नयाँ मोड दिने अपेक्षा गरिएको छ।