नेपाल प्रहरीले देशभर ठूलो संख्यामा प्रहरी अधिकृतहरूको सरुवा गरेको छ । जिल्ला प्रहरी कार्यालय चितवनका प्रहरी प्रमुख एसपी गोविन्द पुरी पनि सरुवाकोे सूचिमा परेका छन ।

प्रहरी प्रधान कार्यालयले शुक्रबार सार्वजनिक गरेको सरुवा सूचीअनुसार एसपी पुरीको नेपाल प्रहरी प्रदेश कार्यालय अपराध अनुसन्धान शाखामा सरुवा गरिएको हो । उनी काजस्वरूप नेपाल प्रहरी प्रधान कार्यालय अपराध अनुसन्धान विभागमा रहने जनाइएको छ ।

उनको स्थानमा राष्ट्रिय प्रहरी प्रशिक्षण प्रतिष्ठान तालिम शाखामा कार्यरत एसपी रामेश्वर पौडेल चितवन आउने भएका छन् । यस्तै जिल्ला प्रहरी कार्यालय चितवनमा कार्यरत डीएसपी रविन्द्र खनालको पनि सरुवा भएको छ । उनको ठाउँमा डीएसपी चन्द्र भूषण यादव आउने भएका छन् ।

प्रहरी प्रधान कार्यालयले एकैदिन १४९ जना डीएसपी र ४६ जना एसपीको सरुवा गरेको जनाएको छ । प्रहरी संगठनभित्र नियमित प्रशासनिक प्रक्रिया अन्तर्गत सरुवा गरिएको बताइएको छ ।