माडीको बसन्तपुरमा सञ्चालित माडी क्रिकेट कप २०८० को उपाधि ’एच.डि.पी. गैंडाकोट स्टार्स नवलपुरले उचालेको छ । टस जितेर पहिला ब्याटिङ गरेको कलैया क्रिकेट क्लबले १९ ओभरमा २२४ रन बटुल्दै अल आउट हुन पुग्यो भने गैंडाकोट स्टार्सले १८ ओभरमा ८ विकेट गुमाउँदै २२५ रनको लक्ष्य प्राप्त गरि प्रतियोगिताको उपाधि उचालेको हो ।

भरतपुर महानगरपालिकाको नगरप्रमुख रेणु दाहालको प्रमुख आतिथ्यतामा सम्पन्न कार्यक्रममा माडी नगरपालिकाको उपप्रमुख खेमप्रसाद महतोको विशिष्ट अतिथ्यता रहेको थियो । कार्यक्रममा विभिन्न राजनैतिक दलका प्रतिनिधि, सामाजिक अगुवा, युवा व्यवसायि, माडीका विभिन्न वडाका वडाध्यक्षहरु लगायतको उपस्थिति रहेको थियो ।

कार्यक्रममा बोल्दै प्रमुख अतिथि रहनुभएको भरतपुर महानगरपालिकाको नगरप्रमुख रेणु दाहालले एकपछ अर्को सफलता हासिल गर्दै देशलाई राष्ट्रिय तथा अन्तराष्ट्रिय प्रतियोगिता जिताउन सफल भएको नेपालले क्रिकेटमा युवाहरुको ध्यान तान्न सफल भएको बताउनुभयो । त्यस्तै, देशमा हालसम्म एउटापनि अन्तराष्ट्रिय स्तरको व्यवस्थित रङगशाला नभएकोले भरतपुर महानगरापालिकामा बन्दै गरेको गौतमबुद्ध क्रिकेट रङगशालाको काम छिट्टै अगाडी बढ्ने बताउनुभयो ।

माडीका ३ टिम सहित कुल ८ टिमको सहभागिता रहेको खेलको बिजेता टिम ’एच.डि.पी. गैंडाकोट स्टार्स नवलपुरलले नगद रु. १ लाख र उपबिजेता कलैया क्रिकेट क्लबले नगद रु. ५० हजार सहित ट्रफी, मेडल र प्रमाणपत्र प्राप्त गरेका छन् । साथै विधागत रुपमा उत्कृष्ट हुन सफल खेलाडी तथा टिमलाई समेत पुरस्कृत समेत गरिएको आयोजक बसन्तपुर युथ क्लबका अध्यक्ष पदम बिलास पन्तले बताउनुभयो ।