नेकपा एमाले माडी नगर कमिटि अध्यक्ष नारायण प्रसाद अधिकारीले नेकपा एमालेमा कुनैपनि गुट उप-गुट नभइ पार्टी एकढिक्का भएर अघि बढिरहेकाे धारणा राख्नुभएकाे छ ।

नेकपा एमाले माडी नगर कमिटीद्वारा पार्टी कार्यालय, बसन्तपुरमा शुक्रबार आयाेजित पत्रकार सम्मेलनमा, ‘एमालेमा ओली गुट, विश्नु पाैडेल गुट जस्ता धारहरू छ कि छैन ?” भन्ने पारदर्शी अनलाइनका सम्पादक प्रेम पाैडेल उज्ज्वले राख्नुभएकाे प्रश्नकाे जवाफ दिंदै उहाँले साे कुरा व्यक्त गर्नु भएकाे हाे ।

नेकपा एमालेमा कुनैपनि धार नरहेकाे र त्यसमा पनि माडीकाे सन्दर्भमा एमाले माडी एकढिक्का भएर अघि बढिरहेकाे बताउनुभयाे । नेकपा एमालेले विभाजनका चाेटहरू खेपिसकेकाे र माडीमा झन् साझा एकता र साझा धारणाकाे साथ अगाडि बढिरहेकाे स्पष्ट पार्नुभयाे ।

नेकपा एमाले माडीकाे माघ २६ र २७ गते सञ्चालन हुन लागेकाे तेस्राे नगर अधिवेशनबारे जानकारी दिन पार्टी कार्यालय बसन्तपुरमा आयाेजित पत्रकार सम्मेलनमा नेकपा एमाले केन्द्रीय समिति सदस्य यम बहादुर परियार ‘इन्द्रजित’, नेकपा एमाले चितवन जिल्ला उपाध्यक्ष श्याम विष्ट, जिल्ला कमिटि सदस्य एवं माडी नगर प्रमुख तारा कुमारी काजी महताे, श्रीप्रसाद दवाडी लगायत पार्टि प्रतिनिधिहरू र सञ्चारकर्मीहरूकाे उपस्थिति रहेकाे थियाे ।

नगर अधिवेशनमा सहभागी हुने २०८ जना प्रतिनिधि छनाैट भैसकेका छन् भने सर्वसम्मतिले पदाधिकारी चयन गर्न आन्तरिक दाैडधुप चलिरहेकाे छ । #PRD8110256