भरतपुर महानगरपालिकाको बहुप्रतिक्षित सहकार्यात्मक प्रशासनिक भवन निर्माण अन्तिम चरणमा पुगेको छ।

करिब रु ५३ करोड ३२ लाख ४१ हजार लागतमा निर्माणाधीन २२१ कोठाको ६ तले भवन मध्ये ८८ प्रतिशत काम पूरा भएको महानगरका इन्जिनियर सन्तोष आचार्यले जानकारी दिनुभयो ।

नयाँ भवन पूरा भएपछि हाल महानगरले नौवटा छुट्टाछुट्टै भवनबाट दिइँदै आएको सेवा एकीकृत रूपमा उपलब्ध हुने छ। आफ्नै आधुनिक तथा सुव्यवस्थित भवन नभएकै कारण सेवा प्रवाह विगतदेखि नै बिखण्डित र कम प्रभावकारी हुन बाध्य भएको जनाइएको छ।