चितवनमा चिरपरिचित कृष्णहरि प्रसाईं सामाजिक क्षेत्रमा समेत उत्तिकै परिचित हुनुहुन्छ । वि.स. २०२९ सालमा चितवनमा जन्मनुभएका प्रसाईं सानै उमेरदेखि सामाजिक क्षेत्रमा सरिक हुनुभयो । अहिले उहाँ बाटुली पोखरी वन उपभोक्ता समूहको अध्यक्ष समेत हुनुहुन्छ । सामाजिक क्षेत्रमा उहाँको अनुभवलाई समेटेर हाम्रा पारदर्शीकर्मी अजित अधिकारीले प्रसाईंसंग गर्नुभएको संक्षिप्त कुराकानी

यहाँलाई हार्दिक स्वागत छ, पारदर्शी अनलाइन डटकममा ?

धन्यवाद अजित जि !

आराम हुनुहुन्छ ?

आराम छु ।

आजभोलि के काममा व्यस्त हुनुहुन्छ ?

अजित जि ! विभिन्न सामाजिक संघसंस्थामा आबद्ध छु । विभिन्न सभा सम्मेलनमा समेत अध्यक्ष भएको नाताले उपस्थिति जनाउनुपर्ने हुन्छ । त्यही भएरपनि आफ्नो कर्ममा व्यस्त नै छु ।

खासगरी तपाईंलाई सामाजिक कर्ममा लाग्ने प्रेरणा कसरी जाग्यो ?

अजित जि ! म सामाजिक कर्ममा सानै उमेरदेखि लागेको हुँ । मेरो बाल्याबस्था गाउँघरमा बित्यो । म एउटा मध्यम वर्गको मान्छे हुँ । मेरो बुवाआमा खेतीपाती गर्नुहुन्थ्यो । बाबुआमाले देखाएको बाटो र सपना पूरा गर्नु एउटा छोराको कर्तव्यपनि हो ।

पर्यटन प्रवर्द्धनका लागि कस्तो काम भइरहेको छ ?

पर्यटन प्रवर्द्धनमा ठूलो काम भएको छ । तालको व्यवस्थापनसंगै पर्यटन भित्र्याउनका लागि समेत हामीले दुईवटा डुङ्गा भित्र्याएका छौं । धेरै काम गर्न बाँकी छ । आन्तरिक तथा वाह्य पर्यटकको आवागमन समेत बढ्दो छ । प्रदेश र केन्द्रबाट समेत ताल संरक्षणका लागि समेत बजेट परिरहेको छ । पोखरीसम्म जानको लागि समेत बाटो निर्माण र व्यवस्थित ड्याम बनाउने काम भइरहेको छ ।

यहाँ घुम्न आउने आन्तरिक तथा वाह्य पर्यटकले के के देख्न सक्छन् ?

अजित जि ! बाटुली पोखरी आफैंमा एक पर्यटकिय क्षेत्र हो । यहाँ शुन्दर वनको आडमा बस्ती छ । विभिन्न जातजातिको बसोबास छ । सबैका आआफ्नै भेषभुषा र परम्परा छन् । प्राकृतिक सम्पदाले समेत रमणिय क्षेत्र छ । विभिन्न प्रजातीका चराचुरुङ्गीहरु ठुलठुला जंगली जनावर बाघ, भालु, हात्ती, गैंडा जस्ता जनावर सहजै हेर्न सकिन्छ । पिकनिक स्पोर्ट्स समेत रहेकाले विभिन्न क्षेत्रका मानिसहरु यहाँ आउने गर्छन् ।

उसोभए यहाँ कहाँबाट मानिसहरु आउने गरेका  छन् ?

अजित जि ! यहाँ देशका विभिन्न जिल्ला तथा क्षेत्र यसैगरी हाम्रै छिमेकी राष्ट्र भारतबाट समेत मानिसहरु आउने गरेका छन् । एकपछि अर्को गर्दै दिनानुदिन पर्यटकको संख्यामा समेत वृद्धि हुँदै गएको छ ।

 वन जङ्गलको संरक्षणमा यहाँहरुको अभियान कस्तो छ ?

हाम्रो वन जङ्गल जोगाउने अभियानमा हाम्रो ज्यादै ठूलो भूमिका छ । आजको परिवर्तनकारी समाजमा काम गर्नपनि त्यति नै गाह्रो छ । समाजमा वनजङ्गलको महत्त्व दर्शाएर यहाँका धार्मिक तथा ऐतिहासिक स्थल र त्यसको प्रचारप्रसार, आम नागरिकमा वन जंगल संरक्षण सम्बन्धि जनचेतना र वृक्षरोपण कार्यक्रम समेत गर्दै आइरहेको छ ।

सामाजिक क्षेत्र अहिले कत्तिको चुनौतीपूर्ण छ ?

अजित जि ! सामाजिक क्षेत्र पक्कैपनि चुनौतीपूर्ण छ । यहाँ जसअबजस दुवै छ । तर आफू लागेको क्षेत्र राम्रो होस् भन्ने चाहना त सबैमा हुन्छ । तापनि आर्थिक क्षेत्रमा सबल बन्न यो सामाजिक कर्मले दिदैन । अहिलेको यो महङ्गो जमानामा निशुल्क सामाजिक कर्म गरेरपनि बाँच्न एकदम गाह्रो छ ।

यहाँ कतिसालदेखि आबद्ध हुनुभयो ?

म यहाँ ६२/६३ देखि आबद्ध भएको हुँ । दुई कार्यकाल सचिब एक कार्यकाल सल्लाहकार र अहिले हाल अध्यक्षमा नियुक्ति भएको छु ।

केके काम गर्न बाँकी छ ?

सडक, बिजुली बत्तिको निर्माण गर्न अझै बाँकी छ । तालको व्यवस्थापनमा जोडदिन आबश्यक छ । प्रयाप्त डुङ्गाको व्यवस्थापन नहुँदा समेत आउजाउमा समस्या देखिएको छ ।

वार्षिक आम्दानी कस्तो छ ?

वार्षिक आम्दानी हालसम्म राम्रो रहेको छ । खासगरी आन्तरिक वाह्य पर्यटकहरु फाल्गुन महिनादेखि बढी आउने हुँदा त्यसपछि घुइँचो लाग्ने गर्छ । चारैतिर हरियाली वन जंगल देख्न सकिन्छ । हामीकहाँ पर्यटकका लागि बीसहजारी ताल र बाटुली पोखरी आकर्षक केन्द हो ।

नेपालमा पर्यटन वृद्धिमा कस्तो खालको भूमिका खेल्नुपर्ला ?

अजित जि ! हाम्रो देश सम्भावनाले भरिपूर्ण छ । यहाँका प्राकृतिक जडिबुटी, सम्पदा, इन्धन हाम्रा महत्त्वपूर्ण सम्पत्ति हुन् । तर हामीले यिनको महत्त्व बुझ्न नसक्दा आज यो अवस्था आएको हो  । हाम्रो देशमा थुप्रै पर्यटकिय गन्तव्य छन् । दुखको कुरा त्यहाँसम्म जान मिल्ने मोटर बाटोको अझै निर्माण हुन सकेको छैन । हामीकहाँ आफूले नगर्ने अनि अरुको मुख ताक्ने प्रवृत्ति यो नै हाम्रो देशका लागि घातक हो ।

सर्वप्रथम त, पर्यटकको वृद्धि गराउन राज्यले महत्त्वपूर्ण भूमिका खेल्नुपर्छ । जस्तै, पर्यटकका लागि राम्रो होटलको प्रबन्ध मिलाउनुपर्छ, गन्तव्य पहिचानका लागि पथप्रदर्शकको व्यवस्था गर्नुपर्छ,  देश तथा बिदेशमा प्रचारप्रसारको व्यवस्था, सस्तो र सर्वसुलभ मूल्यमा खान बस्न र आउन जानको व्यवस्था, सम्भावित धार्मिक तथा पर्यटनको खोजी आदि गर्नालेपनि पर्यटकको वृद्धि हुन सक्छ ।

अन्त्यमा यहाँलाई केही भन्नु छ ?

अजित जि ! सर्वप्रथम त, पहिला यहाँलाई धेरैधेरै धन्यवाद ! मलाई तपाईंको लोकप्रिय मिडिया पारदर्शी अनलाइनमा स्थान दिनुभएकोमा म यहाँप्रति निकै आभारी छु । हामी जस्ता समाजसेवी व्यक्तिको अनुभवलाई सबैमाझ साटासाट गर्ने समय दिनुभएकोमा यहाँलाई पनि धन्यवाद !