चितवनमा संविधान संशोधनको माग सहित विभिन्न विषयमा छलफल तथा अन्तरक्रिया हुने भएको छ ।
भोलि शनिबार भरतपुरमा नेपाली काँग्रेसको बुद्धिजीवी विभाग र डेमोक्रेटिक लयर्स एसोसिएसनले वर्तमान संविधान संशोधनबारे खुल्ला अन्तरक्रिया कार्यक्रम गर्ने भएको हो ।
संविधान संशोधनको आवश्यकता र चुनौतीको विषयमा पेशागत बुद्धिजीवीहरूको सुझाब जिज्ञासा सुन्ने उद्देश्यले अन्तरक्रिया गर्न लागिएको नेपाली कांग्रेसकी केन्द्रीय सदस्य एवं महिला नेतृ डिला संग्रौलाले बताउनुभयो ।
उहाँले अन्तरक्रिया मार्फत पेशागत बुद्धिजीवीहरूको राय सुझाब लिएर पार्टीलाई अगाडि बढाउने जानकारी दिनुभयो । महिला नेतृ संग्रौलाका अनुसार वर्तमान संविधानमा हरेक १० वर्षमा संविधानलाई पुनरावलोकन गर्नुपर्ने व्यवस्था रहेको बताउँदै उठेका प्रश्नहरूको जवाफ दिनुपर्नेमा जोड दिनुभयो ।
नेपाल प्रेस युनियन चितवनले भरतपुरमा गरेको पत्रकार सम्मेलनमा बोल्दै नेपाली कांग्रेस चितवनका सभापति राजेश्वर खनालले खुल्ला अन्तरक्रियामा पार्टी समर्थक मात्रै नभई सबैजना आएर संविधान संशोधनको विषयमा धारणा राख्न सकिने बताउनुभयो । उहाँले चितवनमा गरिएको बृहत अन्तरक्रियामा उठेका सवालहरुले संविधान संशोधनको मुद्दालाई थप पेचिलो बनाउने विश्वास लिनुभयो ।
भरतपुरस्थित होटल सिएमटीमा हुने अन्तरक्रियामा सहभागी हुन सांसद डा. प्रकाशशरण महत, डा. डीला संग्रौला पार्टीका नेता कार्यकर्ता चितवन आइपुगेका छन् । अन्तरक्रिया बिहान ११ बजेबाट सुरु हुने नेपाली कांग्रेस चितवनले जनाएको छ ।