नेकपा एमाले माडी नगर समितिको यहि माघ २६ गते शनिबार र २७ गते आइतबार सञ्चालन हुने तेस्रो नगर अधिवेशनको ९५ प्रतिशत काम सकिएको छ ।
गत माघ ५ गते बसेको नगर कमिटिको विस्तारीत बैठकले माडी नगर अधिवेशनको मिति तय गरेको थियो । अधिवेशनलाई व्यवस्थित र भव्य बनाउन विभिन्न उप समितिहरु गठन गरिएको छ ।
अधिवेशनलाई सफल पार्न नगर अध्यक्ष नारायण प्रसाद अधिकारीको संयोजकत्वमा प्रतिवेदन लेखन, नगर उपाध्यक्ष रामेश्वर चौधरीको संयोजकत्वमा आर्थिक व्यवस्थापन, कृष्णराज अधिकारीको संयोजकत्वमा प्रचारप्रसार उप– समित त्यस्तैगरि हर्क चापागांईको संयोजकत्वमा खाद्य व्यवस्थापन, टंक प्रसाद पौडेलको संयोजकत्वमा मञ्च व्यवस्थापन, मनि कुमारी महतोको संयोजकत्वमा अतिथी सत्कार, मुन्ना मियाँको संयोजकत्वमा स्वयं सेवक परिचालन र सुर्यकान्त खनालको संयोजकत्वमा प्रतिनिधी व्यवस्थापन उप–समिति गठन गरिएको छ ।
माडीको नयाँ बजार बसन्तपुरस्थित होटल प्याराडाइजमा सञ्चालन हुने उद्धाटन सत्रमा पुर्व स्वास्थ्य तथा जनसंख्या मन्त्री, नेकपा एमाले स्थायी कमिटि सदस्य एवं जनसंगठन विभाग प्रमुख भानुभक्त ढकालको प्रमुख आतिथ्यता रहने जनाइएको छ ।
त्यस्तै पोलिटव्युरो सदस्य एवं चितवन जिल्ला इन्चार्ज देवी ज्ञावालीको विशिष्ट अतिथि र केन्द्रिय कमिटि सदस्य लगायत पार्टी प्रतिनिधिहरुको अतिथ्यता रहने जनाइएको छ । अधिवेशनले २०८ जना प्रतिनिधिहरुको सहभागितामा पदाधीकारी चयन गर्नेछ ।
