माडी नगरपालिका – ८ स्थित बैकुण्ठ तालमा आन्तरिक पर्यटकको चहलपहल बढ्दै गएको छ । बैकुण्ठ धाम पुग्ने बाटो कालोपत्रे भएसंगै वर्षातको समयमा समेत पर्यटकहरु झरना अबलोकन तथा तालमा पौडि खेल्न जानेको संख्यामा वृद्धि भएको हो । यसअघि सो क्षेत्रमा पुग्ने सडक हिलाम्य हुँदा सवारीसाधन पुग्न कठिन हुने गरेको थियो भने पर्यटकहरुले सास्ति खेप्नुपरेको थियो ।
माडी लगायत जिल्ला बाहिरका पर्यटकहरु विशेषगरी शनिबार तथा सार्वजनिक विदाका दिनमा बैकुण्ठे ताल पुग्ने गर्दछन् । माडीको महत्वपुर्ण बैकुण्ठ तालमा माछाबाट प्राकतिक थेरापी (फिस पेडिक्वेर) को समेत अनुभति लिन सकिन्छ ।
प्राकृतिक सुन्दरताले भरिपूर्ण माडीकाे बैकुण्ठ तालले धार्मिक महत्व समेत बोकेको छ । बैकुण्ठ तालमा स्नान गरि त्यहाँको जल लगि बैकुण्ठेश्वर भगवानलाई अर्पण गरेपछि सम्पुर्ण पाप नाश हुने बराह पुराणमा उल्लेख छ भने भगवान श्री राम बनवास जाने क्रममा बैकुण्ठ क्षेत्रमा स्नान गरेको शास्त्रमा जनाइएको छ ।
बैकुण्ठ क्षेत्रमा हरेक वर्ष बालाचतुदर्शीको दिन सतबिज छर्न विभिन्न ठाउँबाट भक्तजनहरुको घुइँचो लाग्छ भने सो समयमा मेला समेत लाग्ने गर्दछ ।
(ताल वरपर फाेहाेर बढ्दै गइरहेकाेले सरसफाइ समेत गर्न जरूरी देखिएकाे छ ।)
