जिल्लामा उत्पादित महले बजार पाउन नसक्दा किसानहरु चिन्तित हुन थालेका छन् । भारतबाट आउने महका कारण स्वदेशी महको उत्पादन लागत बढी हुने हुँदा बिक्री कम हुने भएकाले किसान समस्यामा पर्न थालेका हुन् ।
प्रधानमन्त्री कृषि आधुनिकीकरण परियोजना कार्यान्वयन इकाई चितवनका कृषि अधिकृत इन्द्र शर्मा ढुंगानाले भन्नुभयो, ‘चितवनमा बार्षिक मह उत्पादन करिब जोनको क्षेत्रमा ४ सय ४७ मेट्रिक टन निकासी हुने गरेको र उत्पादन करिब ५०० मेट्रिक टन सम्म छ ।’ भारतीय महको आयातका कारण स्वदेशी महले बिक्रीका लागि स्थान नपाएको बताउनुभयो ।
चरनको अभाव र बिदेशी महको आयातका कारण स्वदेशमा मौरीपालन गर्ने किसान समस्यामा पर्दै गएको उहाँले जानकारी दिनुभयो, ‘बजारमा विदेशी मह बिक्री भइरहेको छ । नेपाली मह घरमा थन्क्याउनुपर्ने बाध्यता छ।’ विभिन्न स्थानमा मौरी चराउन जाँदा विषादी हालीदिने, चोरी हुने र स्थानीय तहहरूले अन्यत्रबाट मौरी ल्याउन नदिने भन्दै आनाकानी गर्ने गरेकाले समेत किसान पलायन हुँदै गएको उहाँको भनाइ छ ।
नेपालमा वार्षिक चार हजार दुई सयदेखि चार हजार पाँच सय मेट्रिक टनसम्म मह उत्पादन हुँदै आएको छ । यहाँ उत्पादित महमध्ये दुई हजार मेट्रिक टन मह गोदाममा थन्किएको उहाँले जानकारी दिनुभयो ।
‘बजारीकरणमा समस्या हुँदा किसानले व्यवसाय छाडेर पलायन हुनुपर्ने अवस्था आएको छ ।’ अहिले राप्ती, कालिका, खैरहनी, रत्ननगर, माडी र भरतपुर महानगरपालिकामा मौरीपालक किसानहरुले मह उत्पादन गर्दै आइरहेको उहाँले जानकारी दिनुभयो ।