संघीय खानेपानी तथा ढल व्यवस्थापन आयोजना र भरतपुर खानेपानी व्यवस्थापन बोर्डको लागत साझेदारीमा दुईवटा नयाँ खानेपानी आयोजना निर्माण हुँदैछन् ।
बेलचोक सहलगानी खानेपानी आयोजना र गौरीगञ्ज खानेपानी आयोजना निर्माण हुन लागेका हुन् ।
दुवै आयोजनामा ओभरहेड ट्याङ्की निर्माण, पुरानो पाइपलाइन प्रतिस्थापन एवं नयाँ पाइपलाइन विस्तार गरिनेछ । दुई खानेपानी आयोजनाको कुल लागत ५० करोड चार लाख ४९ हजार रूपैयाँ रहेको छ । संघीय खानेपानी तथा ढल व्यवस्थापन आयोजना भरतपुरका प्रमुख सुन्दर सुवेदीले अबको २० दिनभित्र दुवै आयोजनाको ठेक्का आह्वान गरिने बताए ।
लागत साझेदारीमा खानेपानी आयोजना निर्माण गर्न भरतपुर खानेपानी व्यवस्थापन बोर्डले बजेटको सुनिश्चितता गरिसकेको छ ।
हामी त्यसकै काममा लागिरहेका छौँ । अब १५ देखि २० दिनभित्र दुवै आयोजनाको ठेक्का निकाल्छौँ ।’ बेलचोक सहलगानी खानेपानी आयोजना १९ करोड ९५ लाख ३० हजार २१० रूपैयाँमा निर्माण गर्न लागिएको भरतपुर खानेपानी व्यवस्थापन बोर्डका कार्यकारी निर्देशक सञ्जय बरालले बताए । यो आयोजनामा संघीय खानेपानीको ७० प्रतिशत र बोर्डको ३० प्रतिशत लगानी रहने उनले बताए ।
आयोजनाको कुल लागतको १० प्रतिशत अर्थात् एक करोड ९९ लाख ५३ हजार रूपैयाँ बोर्डले मङ्गलबार संयुक्त खातामा जम्मा गरेको उनले जानकारी दिए ।
‘यो आयोजनाका लागि हामीले मङ्गलबार झन्डै दुई करोड रूपैयाँ संयुक्त खातामा जम्मा गरिसकेका छौँ’, उनले भने, ‘भरतपुर–३ को बजार क्षेत्रमा यो आयोजनाको पानी वितरण हुनेछ, त्यसका लागि ओभरहेड ट्याङ्की, नयाँ पाइप विस्तार र पुरानो पाइप प्रतिस्थापन गरी ठूलो साइजको पाइप राख्नेछौँ ।’ उनका अनुसार डिप बोरिङले निकालेको पानी प्रशोधन गरेर वितरण गरिनेछ ।
त्यस्तै, ३० करोड नौ लाख १९ हजार ९०४ रूपैयाँको लागतमा गौरीगञ्ज खानेपानी आयोजना निर्माण हुन लागेको उनले बताए । यो आयोजनामा संघको ९० प्रतिशत र बोर्डको १० प्रतिशत लगानी रहनेछ । बोर्डले व्यहोर्ने रकमको एक प्रतिशतले हुन आउने ३० लाख नौ हजार १९९ रूपैयाँ एक हप्ताअगाडि संयुक्त खातामा जम्मा गरिएको उनको भनाइ छ ।
भरतपुर खानेपानी बोर्डको खानेपानी उपभोग गर्ने ग्राहकको संख्या करिब ४१ हजार छ । दैनिक खानेपानी उत्पादन तीन करोड ४८ लाख लिटर छ भने दैनिक दुई करोड ४६ लाख लिटर खपत हुने गरेको बरालले बताए । खानेपानीको चुहावट २९ प्रतिशत रहेको उनले जानकारी दिए । ‘सडक निर्माण तथा विस्तारका क्रममा खानेपानीका पाइप फुटाइँदा चुहावट बढी देखिएको छ’, उनले भने । उनका अनुसार २०७० साल फागुनदेखि खानेपानीको महसुल बढेको छैन । १० हजार लिटरसम्म पानी खपत गर्ने निजी/घरायसी ग्राहकले न्यूनतम महसुल १०० रूपैयाँ तिर्नुपर्छ भने बढी खपत गर्ने ग्राहकले प्रतिहजार लिटर १८ रूपैयाँ तिर्नुपर्छ ।
संस्थागत ग्राहकले भने न्यूनतम १० हजार लिटरसम्म खपत गर्दा न्यूनतम महसुल १३५ रूपैयाँ तिर्नुपर्छ । त्यसभन्दा बढी खपत गरे प्रतिहजार लिटर २० रूपैयाँ तिर्नुपर्ने व्यवस्था रहेको बोर्डले जनाएको छ । २७ हजार लिटरसम्म पानी खपत गर्ने निजी/संस्थागत ग्राहकले न्यूनतम ९७५ रूपैयाँ र त्यसभन्दा बढी खपत गर्दा प्रतिहजार लिटर ३० रूपैयाँ तिर्नुपर्छ ।
