गत वर्षदेखि शुरु भएको चित्तौन कचेहेरी-विचारहरुको उत्सव’को दोसो संस्करण फेरि शुरु हुँदैछ ।

सो कार्यक्रम यही मंसिर २८ र २९ गते नारायणगढस्थित नारायणी कला मन्दिरमा संचालन हुनेछ । उत्सवमा नेपाल, भारत र पाकिस्तानका गरी ५० हाराहारी वक्ताहरु उपस्थित हुनेछन् । उत्सवमा पाकिस्तानी लेखक, वैज्ञानिक, अभियन्ता तथा बौद्धिक अगुवाद्वारा परवेज हुडबोयले विद्वत प्रवचन दिनेछन् ।

यसपटक कार्यक्रमको आयोजना चितवनमा सक्रिय युवाहरुको संस्था बेटर चितवनले गर्दैछ भने डबली द स्पेस, मन्धन चितवन, नारायणी कला मन्दिर र न्यु लाइफ मिसनले सह-आयोजना गर्दैछन्।
बेटर चितवनका संस्थापक सागर कार्की यो उत्सवको संयोजक हुनुहुन्छ । भने लेखक सरिता तिवारी उत्सव निर्देशक र जीवन क्षेत्री सह निर्देशक हुनुहुन्छ।

२०८० सालमा भएको उत्सवको पहिलो संस्करणमा चितवनको बस्ती विकास तथा देशभरको विकासमा किनारा लगाइएका आदिवासीहरुका मुद्दा प्रमुख रुपमा उठाइएको थियो ।
यस पटक दक्षिण एसियाको राजनीतिमा देखा परेको साम्प्रदायिक उभार, पृणा, ध्रुवीकरण र हिंसामाथि मुल रुपमा चर्चा हुनेछ। यो विषयले डा. हुडबोयको विद्वत प्रवचनमा ठाउँ पाउनेछ।

त्यसै गरी पाकिस्तानलाई पाँच दशकदेखि नियालिरहेका डा. हुडबोय तथा भारतमा दशकौंदेखि निरन्तर घृणाको राजनीतिविरुद्ध कलम र अभियान चलाउँदै आइरहेका लेखक हर्ष मन्दरसहितको प्यानलमा यसै विश्वकेन्द्रित छलफल हुनेछ ।

छिमेकी देशहरुका अनुभवबाट नेपालले के सिक्न सक्छ । र उताका गल्ती कसरी नदोहोर्याउन सकिन्छ । भन्नेबारेमा यथेष्ट संबाद होस् भनेर उत्सवको अघिल्लो दिन दुवै विदेशी वक्ताहरुसित काठमाडौँमा विभिन्न राजनीतिक दलका नेता र बुद्धिजीवीहरुको विशेष अन्तक्रियात्मक कार्यक्रम समेत यसपटकको चित्तौन कचेहेरीको हिस्सा छ ।

यसै गरी देशको प्राज्ञ र बौद्धिक वर्गसित पनि छिमेकी देशहरुको अनुभव साट्नका लागि त्रिवि समाजशास्र केन्द्रिय विभागको समन्वयमा कीर्तिपुरमा त्यस्तै कार्यक्रम आयोजना हुँदैछ। त्यसै गरी विज्ञान शिक्षाले कसरी विद्यार्थीलाई असल नागरिक बनाउन सक्छ र बनाउनुपर्छ भन्नेबारेमा डा. हुडबोयका लेक्चरहरु पनि काठमाडौं र चितवनका आधा दर्जन स्कुल र कलेजहरुमा आयोजना हुँदैछन् ।
यस अघि नै भरतपुरको सप्तगण्डकी क्याम्पसमा जलवायु र पर्यावरणका मुद्दा समेटेर कचेहेरीको तयारीस्वरुपको एउटा कार्यक्रम भइसकेको छ।

प्रस्तावित उच्च शिक्षा विधेयक लगायत समग्रमा नेपालको उच्च शिक्षालाई थला पारिरहेका तत्वहरू र तिनबाट बाहिर आउने उपायबारे गहन शोधपछि प्राध्यापक चैतन्य मिश्रले तयार गर्नुभएको प्रस्तुति पनि उत्सवको यो संस्करणको मुख्य हिस्सा हुने उत्सव संयोजक सागर कार्कीले जानकारी दिनुभयो ।

जुन सुन्न दर्शक दीर्घामा मुख्य राजनीतिक दलका नेताहरु रहने कार्यक्रम छ। यसबाहेक आजको नेपाली युवापुस्ताले वर्तमानलाई कसरी हेर्दैछ र भविष्यबारे के योजना बनाउँदैछ भन्ने समेटेको युवाहरुको सत्र पनि सामेल छ ।

बालबालिकाहरुका मुद्दा उठाउन बालबालिकाहरु नै सहभागी रहने एउटा सत्र छ । पहिलो संस्करणदेखि नै यो उत्सवले प्राथमिकता दिने गरेको पर्यावरण र जलवायु मुद्दामा यसपटक दुई सत्र रहनेछन् ।