चितवनको व्यवसायिक क्षेत्रमा प्रवीण गौतम चिरपरिचित नाम हो । वि.स. २०५२ सालमा चितवनको माडीमा जन्मनुभएका उहाँ सानै उमेरदेखि जिज्ञासु र लगनशील हुनुहुन्थ्यो ।

उहाँले वि.स. २०७२ सालदेखि अटो मोबाइल्स सम्बन्धि कारोबारका क्षेत्रमा बिशिष्ट योगदानदिदै निकै लामो समयको अनुभवबाट वि.स. २०७४ साल साउन ६ गतेबाट गौतमले आफ्नै व्यवसाय संचालन गर्नुभएको हो ।  गौतमले मास्टर्ससम्मको अध्ययन गर्नुभएको छ ।

बिदेश जाने इच्छा गौतममा पनि नभएको भने होइन । तर स्वदेशमा नै केही गर्नुपर्छ भन्ने उदेश्य लिएर उहाँले व्यवसाय संचालन गर्नुभयो । उहाँले हालसालै भरतपुर १० स्थित हाकिम चोकमा होटल (सिएम टी) आडमा महालक्ष्मी मोटर्स संचालन गर्नुभएको छ । उहाँ टिभिएस कम्पनीको तीन पाङ्ग्रे टेम्पोको आधिकारिक बिक्रेता समेत हुनुहुन्छ । यसै सन्दर्भमा हाम्रा पारदर्शीकर्मी अजित अधिकारीले महालक्ष्मी मोटर्सका संचालक प्रवीण गौतमसंग गर्नुभएको संक्षिप्त कुराकानी

यहाँलाई हार्दिक स्वागत छ, पारदर्शी अनलाइन डटकममा ?

धन्यवाद अजित जि !

आराम हुनुहुन्छ ?

आराम छु ।

केमा व्यस्त हुनुहुन्छ ?

आजकल आफ्नै व्यवसाय छ । दिनभरी यसैमा व्यस्त हुन्छु ।

खासगरी व्यवसाय संचालन गर्ने सोच यहाँमा कसरी आयो प्रवीण जि प्रष्ट पारिदिनुस् न ?

अजित जि ! यहाँले सोधिहाल्नुभयो । म सुरुबाट नै यो व्यवसायमा आबद्द थिए । वि.स. २०७२ सालदेखि यो फिल्डमा प्रवेश गरेको म आजसम्म निरन्तर लागिरहेको छु । २/३ बर्षको अनुभवसंगै बिदेश जानुभन्दा बरु नेपालमा नै केही गर्नुपर्छ भन्ने सोचले बिदेश जान मन लागेन । बिदेशमा गर्ने लगानीले आफ्नै देशमा गर्न सकिन्छ भन्ने अठोटले व्यवसाय संचालन गरेको हुँ । अर्को कुरा यो फिल्डमा आउँदा धेरै जना व्यवसायीसंग भेटघाट र चिनजान भयो । त्यसले गर्दापनि व्यापार गर्न ममा झनै ठुलो उप्साह जाग्यो ।

व्यवसाय गर्न अहिलेको समयमा कत्तिको चुनौती छ ?

अजित जि ! अहिलेको सञ्चार र बिज्ञानको युगमा नयाँ टेक्नोलोजीको आबिस्कार भएसंगै व्यापार व्यवसायमापनि थप चुनौती देखिएको छ । ग्राहकको चाहना अनुरुपका सामाग्री र रुचिकर विषयमा ध्यान दिनुपर्छ । एक त अहिले अति नै महँगो जमाना छ । कोरोना कहरपछि व्यवसाय धान्न नै मुस्किल बनिरहेको छ । तापनि जसोतसो व्यवसाय धानिरहेका छौं । असाध्यै जोखिम लिएर बैंकको चर्को व्याज र लोन लिएर व्यवसाय संचालन गर्नु अझ त्यति सहज चाहिँ छैन ।

चितवनमा अटो रेक्साहरुको डिमाण्ड कस्तो छ ?

चितवनमा संतोषजनक नै मान्नुपर्छ अजित जि ! अटोरेक्साको डिमाण्ड मैले अघि नै भनिसकें यहाँलाई आर्थिक मन्दीका कारण थोरै खस्किएको चाहिँ यथार्थ हो ।

व्यवसाय गर्दै गर्दा यहाँले कस्तो पाठ सिक्नुभयो ?

अजित जि व्यवसाय गर्दैगर्दा मैले धेरै कुराको अनुभव लिए । एक त व्यवसाय गर्दा हामी धेरै आत्तिन्छौ । हामीमा धैर्य गर्न सक्ने क्षमता छैन । फेरि आत्तिनु स्वभाविकपनि हो । किनभने, मोटो रकमको लगानी गरेका हुन्छौं हामीले अनि व्यापार के कस्तो होला भन्ने चिन्ताले सताउछ । तर मेरो बुझाइमा व्यापार बढाउनका लागि हामीले हाम्रा ग्राहकलाई सम्मान गर्न सिक्नुपर्छ । व्यापार सम्बन्धि ज्ञान लिनुपर्दोरहेछ अर्को शिक्षा र गोपनियतामापनि ध्यान दिनुपर्दो रहेछ भन्ने कुराको मलाई अनुभव भयो ।

राज्यले के गर्नुपर्ला युवाहरुका लागि ?

राज्यले युवाहरुका लागि विशेष कुराहरूमा जोड दिनुपर्छ । उचित किसिमको शिक्षासंगै युवालाई रोजगारी तर्फ उन्मुख गर्नुपर्छ । व्यवसायिक शिक्षा, घरेलु शिक्षा र कृषि शिक्षामा समेत राज्यले तत्काल जोड दिनुपर्छ । स्वदेशमा संचालित स्रोत र साधनको परिचालन र सदुपयोग, बजारीकरणको व्यवस्था, बजार मुल्यमा एकरुपता, टेक्नोलोजीको आबिस्कार र बिकास, कच्चापदार्थको प्रयोग र उत्पादन, व्यवसायिक तालिम, सहुलियतपूर्ण ऋणको व्यवस्था, जोखिम विमा, व्यवसायिका हकहित र अधिकारको सुनिश्चितता आदि कुरामा तत्काल राज्यले जोड दिनुपर्छ भन्ने लाग्छ ।

तपाईं आफ्नो व्यवसायमा कत्तिको सन्तुष्ट हुनुहुन्छ ?

म एकदम सन्तुष्ट छु । किनभने, म हतारमा यो क्षेत्रमा आएको होइन । धेरै लामो समयको अनुभव आदि कुराले म यसमा जोडिएको हुँ । फरक यत्ति हो । व्यवसायमा मेवाको बोट जस्तो बन्ने या सालको रुख जस्तो बन्ने त्यो आफूमा भर पर्छ अजित जि ! तर मलाई मेरो व्यवसायप्रति गर्व लाग्छ । धैर्यता नै मेरा लागि सफलताको केन्द्रबिन्दु हो ।

हालसम्म कति जनालाई रोजगारी दिनुभएको छ ?

हालसम्म मैले धेरैलाई रोजगारी दिएको छु । अझ भन्नुपर्दा एघार जनालाई रोजगारी दिएको छु ।

अन्त्यमा यहाँलाई केही भन्नु छ ?

अजित जि ! सर्वप्रथम त यहाँलाई धन्यवाद दिन चाहन्छु ! यहाँको लोकप्रिय मिडिया पारदर्शीमा मलाई स्थान दिनुभएकोमा म यहाँप्रति अत्यन्तै खुशी छु । धेरै कुराहरु अघि नै भनिसकें तापनि अन्तिममा केही कुराहरू राख्छु । जस्तोकि हामीकहाँ अरुको मुख ताक्ने प्रवृत्ति छ । यसको अन्त्य गर्दै आफ्नै खुट्टामा उभिने वातावरणको सिर्जना गर्नुपर्छ । हाम्रो देश सम्भावना नै सम्भावनाले भरिपूर्ण देश हो । यसको सदुपयोग गर्दै म जस्ता लाखौं युवाहरुलाई रोजगारी दिलाउन राज्यले तत्काल जोड दियोस् । साथसाथै हामी जस्ता आम युवा व्यवसायीका लागि विभिन्न नीतिगत योजनाहरु अगाडि ल्यायोस् यही नै भन्न चाहन्छु ।

हस् महत्त्वपूर्ण समय र कुराकानीका लागि यहाँलाई धेरैधेरै धन्यवाद छ ?

अजित जि ! यहाँलाईपनि धन्यवाद ! मलाई बिचार राख्ने अबसर दिनुभएकोमा मपनि यहाँप्रति निकै आभारी छु ।